| „დღეს პირველი აპრილია, მოტყუება ადვილია“ – ერთი შეხედვით უწყინარი ფრაზის ქვეშ ღმერთის უარყოფა და გმობა იღებს სათავეს. მოგეხსენებათ, გაზაფხულზე ქრისტიანები ყველაზე დიდ დღესასწაულს – მაცხოვრის აღდგომას ვდღესასწაულობთ. როგორც 1859 წელს გამოცემული „თვენი“ („Месяцеслов“) იუწყება, რომ ჯვარცმა მოხდა 30 მარტს და, შესაბამისად, მაცხოვარი აღდგა სწორედ პირველ აპრილს! ცნობილია, თუ რა საზარელი ტყუილი მოიგონეს მაშინ უფლის ჯვარმცმელმა და უარმყოფელმა ფარისევლებმა – „იესო ნაზარეველის სხეული ღამით ფარულად მოიპარეს მისმა მოწაფეებმა და ახლა გაიძახიან, მკვდრეთით აღდგაო“! აი, როგორ გვაუწყებს ამას მათეს სახარება: „მაშინ უთხრა მათ იესომ: ნუ გეშინიათ; წადით, აუწყეთ ჩემს ძმებს, რომ გალილეას წავიდნენ და იქ მიხილავენ. და როცა ისინი წავიდნენ, აჰა, ზოგიერთი დარაჯთაგანი ქალაქში შევიდა და მოახსენა მღვდელმთავრებს ყველაფერი, რაც მოხდა. ხოლო ისინი შეიკრიბნენ უხუცესებთან ერთად, ბჭობა გამართეს, დიდძალი ფული მისცეს ჯარისკაცებს და უთხრეს: თქვით, რომ მისი მოწაფეები მოვიდნენ ღამით და, ვიდრე გეძინათ, მოიპარეს იგი. და თუ ეს ხმა მიაღწევს მთავრამდე, ჩვენ დავარწმუნებთ მას და უსიამოვნებისაგან გიხსნით. მათაც აიღეს ფული და ისე მოიქცნენ, როგორც დარიგებულნი იყვნენ. და გავრცელდა ეს ხმა იუდეველთა შორის დღევანდელ დღემდე“ (მათე, 28: 10-15). ამ ყოვლადმკრეხელურმა სიცრუემ დაუდო დასაბამი საპირველაპრილო ტყუილებს, რადგან, ვინც ეს ჩვეულება დააკანონა, მისთვის ქრისტეს აღდგომაც ტყუილია, ღმერთის ამქვეყნად ხორციელი შობაც და მისი ყოვლადმხსნელი საკაცობრიო მსახურებაც. ამ წმინდა დღის აბუჩად აგდებით, შეურაცხყოფილი და შეგინებულია შემოქმედი! |
