| 14 ოქტომბერს გარდაიცვალა ქართული ეთნოგრაფიული სკოლის თვალსაჩინო წარმომადგენელი, ცნობილი მეცნიერი და საზოგადო მოღვაწე, კონსტანტინე (კოტე) ჩოლოყაშვილი. დაიბადა 1922 წლის 18 აგვისტოს. 1945 წელს დაამთავრა თბილისის სახელმწიფო უნივერსიტეტის ფილოლოგიის ფაკულტეტი. ეთნოგრაფიისა და მუზეუმმცოდნეობის კურსს ათწლეულების განმავლობაში კითხულობდა პედაგოგიურ ინსტიტუტში, სამხატვრო აკადემიაში, თეატრალურ და ფიზკულტურის ინსტიტუტებში. ხელმძღვანელობდა ეროვნულ ფასეულობათა სახელმწიფო ფონდს. იყო თბილისის საკრებულოს წევრი, წინამძღოლობდა საქართველოს თავადაზნაურთა და მათ თანამდგომთა საკრებულოს. მისი თაოსნობით მხარეთმცოდნეობის მუზეუმები დაარსდა რუსთავსა და ზესტაფონში. თავის უმთავრეს საქმედ კი ქართული საჭურვლის მოვლა-პატრონობას მიიჩნევდა. სიცოცხლის ნახევარზე მეტი სიმონ ჯანაშიას სახელობის სახელმწიფო მუზეუმის იარაღის უმდიდრეს ფონდს შეალია... |
