ელისაბედ II ცდილობს არ ჩამორჩეს ციფრული ტექნოლოგიების საუკუნეს. შობის დღესასწაულს თავის ქვეშევრდომებს იგი ტელეეკრანიდან მიულოცავს ჩანაწერით  სამგანზომილებიან ფორმატში. სწორედ 3D ფორმატში  იწერს ტელეარხი „BskyB“-ი დიდი ბრიტანეთის დედოფლის სიტყვას, რომელიც ეთერში გაჟღერდება 25 დეკემბერს. დედოფლის  მიმართვა ბუკინგემის სასახლიდან გადაიცემა აგრეთვე  „BBC“-ისა და „ITV“-ის არხებით. მაგრამ ტელევიზორებში ამ არხების არსებობა  არ იქნება საკმარისი ჩანაწერის ამ ახალი სახეობის მისაღებად - საამისოდ მაყურებელს სჭირდება სპეციალური ეკრანი და სათვალეები. როგორც გულახდილად აღიარეს ბუკინგემის სასახლეში, აუდიტორია იქნება საკმაოდ მცირე, თუმცა მათთვის, ვისაც არა აქვს 3D ფორმატში ყურების საშუალება, ჩანაწერი ჩვეულებრივი სატელევიზიო გადაცემის სახითაც იქნება მისაწვდომი.

„ჩვენ გვინდოდა შთამბეჭდავნი ვყოფილიყავით. ეს მიმართვა უნდა განსხვავდებოდეს წინა მიმართვებისაგან - წლევანდელი წელი ხომ გამორჩეულია  ბრიტანეთისათვის“ , -განმარტავენ ბუკინგემის სასახლის პრეს-სამსახურში.   

ელისაბედ II-ის გამოსვლას შეავსებს წლევანდელი წლის  ქვეყნის ცხოვრების ამსახველი მნიშვნელოვანი ეპიზოდები - დედოფლის მმართველობის 60 წლის ბრილიანტის იუბილის გარდა, რომელიც განსაკუთრებულად აღინიშნა ქვეყანაში, მთელი პლანეტისათვის დასამახსოვრებელი იყო ზაფხულის ოლიმპიური თამაშები, რომლის გახსნის ცერემონია ერთ-ერთი  ყველაზე სანახაობრივი გამოდგა ოლიმპიადების ისტორიაში.  

ელისაბედ  II გახდება სამეფო ოჯახის პირველი წევრი, ვინც გამოჩნდება ეკრანზე 3D ფორმატში. უფრო ადრე ამ ფორმატზე უარი თქვა პრინცმა უილიამმა. ჟურნალისტები სთავაზობდნენ  მისი ქორწილის ჩაწერას ქეით მიდლტონთან 2011 წლის 29 აპრილს ლონდონის ვესტმინსტერის სააბატოში.

ელისაბედ II-ის ჰოლოგრაფიული პორტრეტი შეასრულა შუქის ინსტალაციის ბრიტანელმა ოსტატმა კრის ლევინმა.