დღეს დიდ ბრიტანეთში დილის 11 საათზე სრულმა მდუმარებამ დაისადგურა - ქვეყანა იხსენებდა პირველ და მეორე მსოფლიო ომში დაღუპულ მეომრებს. მთავარი ღონისძიება გაიმართა კენოტაფის მემორიალთან ლონდონის ცენტრში, სადაც მონაწილეობა მიიღეს დიდი ბრიტანეთის დედოფალმა ელისაბედმა, სამეფო ოჯახის წევრებმა, მთავრობის წევრებმა და პოლიტიკური პარტიების წარმომადგენლებმა. ცერემონიის შემდეგ ვეტერანებმა პარადით გაიარეს ვაითჰოლის ქუჩაზე. საყოველთაო ყურადღების ცენტრში იყო ჰერცოგინია ქეითი, რომელიც მეუღლეს ადევნებდა თვალს სამეფო აივნიდან: პრინცმა უილიამმა ყაყაჩოების გვირგვინი დადო კენოტაფის ობელისკთან. მის გვერდით იყვნენ გრაფინია სოფია და ვიცე-ადმირალი ტიმოთი ლოურენსი. პრესა საგანგებოდ აღნიშნავდა, რომ ქეითს ეკეთა ყაყაჩოს ფორმის გულსაბნევი - ომში დაღვრილი სისხლის სიმბოლო. რამდენიმე დღის წინ კი ჰერცოგინია ქეითი მეუღლესთან - პრინც უილიამთან ერთად შეხვდა ”ვოლონტიორებს” და მათთან ერთად მიაგო პატივი ბრძოლაში დაცემულ მეომრებს. | 
