ბავშვის დაბადების შემდეგ პრინცმა უილიამმა პირველი ოფიციალური სიტყვა წარმოთქვა ”County Show”-ს სასოფლო-სამეურნეო გამოფენაზე კუნძულ ანგლსიზე. უილიამი წარსდგა იმ კუნძულის მცხოვრებთა წინაშე, სადაც ის ქეთრინთან ერთად ცხოვრობდა სამხედრო-საჰაერო ძალებში სამსახურის დროს. სიტყვა მან წარმოთქვა უელსელების მშობლიურ ენაზე. ”ქეთრინს ძალიან უნდოდა ჩემთან ერთად წამოსულიყო. ისიც და ჯორჯიც ძალიან მოხარულნი იქნებოდნენ, აქ რომ ყოფილიყვნენ. ჩვენი პატარა ძალიან ხმაურიანი ბავშვია, მაგრამ ძალიან სიმპათიურიც”, - გულახდილად ისაუბრა უილიამმა ადგილობრივ მცხოვრებლებთან.. უილიამმა აღიარა, რომ ის და ქეთრინი ანგლსის თვლიან ერთ-ერთ ყველაზე უფრო ლამაზ და სტუმართმოყვარე ადგილად, სადაც კი ოდესმე ყოფილან და დაჰპირდა ანგლსელებს, რომ ისინი კვლავაც არაერთხელ ესტუმრებიან კუნძულს, რომელსაც უკავშირდება მათი ბედნიერი ქორწინების პირველი წლები. უილიამის სამსახური სამხედრო-საჰაერო ძალთა ჩრდილოეთ უელსის ბაზაზე უკვე დასასრულს უახლოვდება. ახლა უილიამი ქეთრინთან ერთად ემზადება ლონდონში გადასასვლელად. როგორც იტყობინებიან, პრინცი უილიამი დაიკავებს თანამდებობას ელიტარულ საცხენოსნო პოლკ ”Household Cavalry's”-ში. | 
