– ვინ არის მოყვასი ჩემი? – ჰკითხა ძველი აღთქმის რჯულისმცოდნემ იესო ქრისტეს. მაცხოვარმა კი პასუხად მიუგო იგავი გულმოწყალე სამარიელზე, სადაც აუწერა შემთხვევა, როდესაც გასაჭირში მყოფ ებრაელს თავისი თვისტომნი არ ეხმარებიან, ხოლო ებრაელებისადმი მტრულად განწყობილი, სამარიელი წარმოშობის ადამიანი, დაეხმარება და უჭირისუფლებს. – წადი და შენც ასე მოიქეცი – უპასუხებს იესო შემკითხველს. ამით იესო მხოლოდ რჯულის მცოდნეს კი არა, ყოველ ჩვენგანს შეაგონებს, რომ მოყვასი ჩვენი დედამიწაზე მცხოვრები ნებისმიერი ადამიანია, რომელიც გვიჭირისუფლებს. ქვემოთ აღწერილი მაგალითი ნათლად მიუთითებს ქართველის მიერ იმ მცნების შესრულებაზე, რომელიც მაცხოვარმა დაუდგინა ადამიანებს:

ფორე მოსულიშვილი იტალიის ეროვნული გმირის სახელს ატარებს.

მეორე მსოფლიო ომის დროს, ერთ-ერთ ბრძოლაში სამასამდე გერმანელმა ალყაში მოაქცია თექვსმეტი პარტიზანი, რომლებიც ერთ მიტოვებულ სახლში გამაგრდნენ. სროლა ერთ საათს გაგრძელდა. გერმანელებმა შემოთვალეს: პარტიზანთა მეთაური დაგვნებდეს და დანარჩენებს სიცოცხლეს გაჩუქებთო. მეთაური ყოყმანობდა და გადაწყვეტილება ვერ მიეღო. პარტიზანებს ტყვია-წამალი ელეოდათ და სიკვდილი ელოდათ.

მაშინ შენობიდან გავიდა ფორე მოსულიშვილი – მე ვარ მეთაური! – გაუმარჯოს იტალიას, გაუმარჯოს საქართველოს! – დაიძახა და ტყვია დაიხალა. ასე აჩუქა სიცოცხლე თხუთმეტ იტალიელს ფორემ თავისი გმირული სიკვდილით.