ელისაბედ მეორემ მიიღო „BAFTA“-ს (British Academy of Film and Television Arts)  პრემია იმ წვლილისათვის, რომელიც მას აქვს გაღებული დიდი ბრიტანეთის კინო და ტელეინდუსტრიაში. დედოფალი დააჯილდოვეს ვინძორის ციხე-სიმაგრეში ისეთი საპატიო სტუმრების თანდასწრებით, როგორებიც არიან: ჯორჯ ლუკასი, კრისტოფერ ნოლანი, ტომ ჰუპერი, იდრის ელბა, ედგარ რაინი, მინი დრაივერი, დემიან ლუისი და ედი რედმეინი.

ცერემონია ერთობ მხიარულად ჩატარდა. ასე, მაგალითად, „BAFTA“-ს ხელმძღვანელმა ჯონ უილისმა გაიხსენა მისი უდიდებულესობის მონაწილეობა ლონდონის ოლიმპიადის გახსნაზე და ელისაბედ მეორეს უწოდა „ბონდის ყველაზე დასამახსოვრებელი გოგონა“.

ხოლო პრიზის გადამცემმა კენეტ ბრანამ  დედოფალს აუწყა კინემატოგრაფისტთა დანაბარები: „რიგ ჩემს კოლეგებს, რომლებიც ამ საღამოს აქ არიან მოსულები, სურთ, რომ გამცნოთ -  თუ თქვენ გააგრძელებთ კარიერას ბრიტანული კინოს სამყაროში, მათ აქვთ სცენარებით სავსე საქაღალდე,სადაც თქვენთვის გათვალისწინებულია შესანიშნავი როლები“, - და იქვე დასძინა - „ყველა ეს ფილმი ჯერ არ არის დაფინანსებული, მაგრამ  თქვენი მონაწილეობის შემთხვევაში ისინი აუცილებლად დაფინანსდება!“