როცა ჰერცოგინია ქეთრინი საავადმყოფოში იწვა ტოქსიკოზის გამო, რომელიც ფეხმძიმობით იყო გამოწვეული, ჟურნალისტები ყველა ღონეს ხმარობდნენ, რათა რაიმე ინფორმაცია ნებისმიერი ხერხით მოეპოვებინათ.

ავსტრალიური რადიოს წამყვანმა ჟურნალისტებმა მელ გეიგმა და მაიკლ კრისტიანმა მოახერხეს დაერეკათ ჰოსპიტალში და თავი წარადგინეს, როგორც დედოფალმა ელისაბედ II-მ და პრინცმა ჩარლზმა და მოტყუებით მიიღეს ინფორმაცია ერთ-ერთი მედდისაგან. ეს "ხუმრობა" საბოლოოდ ტრაგედიით დასრულდა.

ტელეარხმა „Sky News“-მა გამოაქვეყნა ინფორმაცია, რომ მედდა ჯასინტა  სალდანა პარასკევს ნახეს გარდაცვლილი - სავარაუდოდ, ქალმა სიცოცხლე თვითმკვლელობით დაასრულა. მას ჰყავდა მეუღლე და ორი შვილი. 

ამასთან, იმ ავბედით დღეს სალდანა თავად არ დაკონტაქტებულა რადიოწამყვანებთან, ის იყო მორიგე მედდა, მან უბრალოდ გადართო ტელეფონი და დააკავშირა ჟურნალისტები თავის კოლეგას. 

ედუარდ VII-ის სახელობის საავადმყოფოს ხელმძღვანელობამ გაავრცელა განცხადება(მანამდე მათ ბოდიში მოუხადეს სამეფო კარს), რომ ჯასინტა სალდანა ოთხი წლის განმავლობაში მუშაობდა ჰოსპიტალში და იყო მაღალი კვალიფიკაციის მედდა.

რადიოსადგურმაც მოიხადა ბოდიში ბოროტი ხუმრობისათვის, მაგრამ თანამშრომლების გათავისუფლებაზე უარი განაცხადა, რადგან ჟურნალისტები ძალიან განიცდიან მომხდარ ფაქტს.

პრინცმა უილიამმა და ჰერცოგინია ქეთრინმაც გამოთქვეს თავისი თანაგრძნობა გარდაცვლილის მიმართ და აღნიშნეს, რომ ეს არის "საშინელი ტრაგედია".