თქვენო უწმიდესობავ და უნეტარესობავ! მოგიძღვნით მდაბალ, გულითად მილოცვას თქვენი ანგელოზის დღის აღსანიშნავად და გილოცავთ ხსენებას თქვენი ზეციური მფარველის - წმიდისა წინასწარმეტყველისა ილია თეზბიტელისა.
ჭეშმარიტად ისტორიულია თქვენი აურაცხელი ღვაწლი და თავდადება, რომელსაც აგერ უკვე, 38 წელიწადია სდებთ საქართველოს სამოციქულო ეკლესიისა და დედა ღვთისას წილხვედრი ჩვენი სამშობლოს კეთილდღეობისა და სამშვიდობოს გასვლისათვის. ღვთისადმი სასოებით, მრწამს რომ თქვენი მამამთავრული ლოცვა-კურთხევითა და ამაგით საქართველოს თქვენს მიერ "მზიან ღამედ" სახელდებული ხანა გაუთენდება და "მზიან დღედ" გარდაექცევა.
გისურვებთ საღმრთო მშვიდობასა და ღვთივდაცულ, მრავალჟამიერ სიცოცხლეს, მფარველობას ყოვლადწმიდისა ღმრთისმშობლისა და მეოხებას წმიდისა ილია წინასწარმეტყველისა!
ქრისტესმიერი, შვილობრივი სიყვარულით თამარ ბაგრატიონ-მუხრანელი
| 
