11 ოქტომბერს არის ჩეხეთის  მთავრის - წმიდა ვაცლავის ხსენების დღე.

     კეთილმსახური მთავარი ვაცლავ ჩეხი თვრამეტი წლისა იყო, როცა ქვეყნის განმგებლობა დაეკისრა. მიუხედავად სიჭაბუკისა, იგი ბრძნულად და სამართლიანად აღასრულებდა მძიმე მოვალეობას და გულმოდგინედ იღვწოდა ხალხის ქრისტიანული განათლებისათვის. ნეტარი ვაცლავი ღრმა განსწავლულობით გამოირჩეოდა, ფლობდა ლათინურ და ბერძნულ ენებს. იგი აშენებდა და ამკობდა ეკლესიებს, მოწიწებით ეპყრობოდა სასულიერო პირებს. მოღალატე დიდებულებმა, სხვა ვარაუდით კი - გერმანულ-კათოლიკურმა პარტიამ წმიდა მთავრის წინააღმდეგ მისი ძმა, ბოლესლავი აღძრა. ბოლესლავმა ტაძრის კურთხევაზე მიიწვია ვაცლავი, მეორე დღეს კი, საცისკრო ლოცვაზე დასასწრებად მიმავალი, ეკლესიის ზღურბლზე მოღალატურად მოაკვლევინა. წმიდანის უხრწნელი ნაწილები პრაღაში, მის მიერვე აგებულ წმიდა ვიტეს ტაძარში განისვენებს.

      წმიდა ვაცლავი თავისი ხალხის დიდი სიყვარულით სარგებლობდა და სიკვდილის შემდეგ  წმიდანად შერაცხული, ჩეხეთის მფარველად ითვლება. პრაღის წმიდა ვიტეს ტაძარი მუდამ სავსეა მომლოცველებით. თვით მისი მუზარადი, სატევარი და ჯავშანი სიწმინდეებად არის აღიარებული. ვაცლავის სახელს ატარებს მოედანი პრაღაში, სადაც 1912 წელს დაიდგა მთავრის ქანდაკება.