კემბრიჯის ჰერცოგინიას არცთუ შემთხვევით მიიჩნევენ აწ გარდაცვლილი პრინცესა დაიანას მიმდევრად,  მონარქიულ ოჯახში დამკვიდრებულ ტრადიციებთან დაპირისპირებულობის კუთხით.

დავიწყოთ იმით, რომ ქეითმაც, ისევე, როგორც დაიანამ, გადაწყვიტა მშობიარობა არა სასახლის კედლებში, არამედ - სამშობიაროში. ამასთანავე - ნამშობიარევი დედა და მისი პირმშო პირველებმა მოინახულეს მიდლტონების ოჯახის წევრებმა და არა დიდედა-დედოფალმა.

კიდევაც მეტი - სამშობიაროდან ქეითი ბავშვთან ერთად გამოვიდა არა კენსინგტონის სასახლეში, არამედ - ქალის მშობლების ადგილ-მამულში. სწორედ აქ იმყოფებიან უილიამი და ქეითი ამჟამად. ეს ყველაფერი გარკვეულად არღვევს სასახლეში დამკვიდრებულ ტრადიციას, თუმცა ქეითი თავის პრინციპებს არ თმობს.

ქეით  მიდლტონის სულ ბოლო განცხადება კი გახლავთ იმის თაობაზე, რომ  ბავშვის პირველ სურათებს, რომლებიც გამოქვეყნდება მომავალ კვირას,  გადაიღებს არა პროფესიონალი ფოტოგრაფი, არამედ - თვითონ!

თავის დროზე ქეითი გატაცებული იყო ფოტოგრაფიით და იღებდა სურათებს მშობლების საიტისათვის. ასე რომ,  ის კარგად არის დაუფლებული  ფოტოგადაღების ტექნიკას. ამავე დროს, ჰერცოგინიას განმარტებით, ასეთი ფოტოები გამოვა უფრო ბუნებრივი, რადგან პატარა ჯორჯი იქნება მისთვის ჩვეულ გარემოში. საერთოდაც - ქეითი ხაზგასმით აღნიშნავს, რომ სურს ვაჟიშვილის აღზრდა საკუთარი პრინციპებით და არამარტო ტახტის მემკვიდრის  აღზრდის აქამდე მიღებული წეს-ჩვეულებით .