დედოფალ ელისაბედ II-ის შვილიშვილი,  ბრიტანეთის პრინცი ჰარი ხუთშაბათს ეწვია ვაშინგტონს, სადაც მას მასპინძლობა გაუწიეს   აშშ-ის პირველმა ლედიმ და რესპუბლიკელთა თვალსაჩინო წარმომადგენელმა - ჯონ მაკკეინმა.

სენატორმა მაკკეინმა  პრინცი მიიღო კაპიტოლიუმის ბორცვზე მდებარე  სენატის რასელის შენობაში  და დაათვალიერებინა ფოტოგამოფენა, მოწყობილი ფონდ „HALO“-ს მიერ, რომლის საქმიანობაც მიმართულია ფეხოსანთა საწინააღმდეგო ნაღმების გავრცელების წინააღმდეგ.

„პრინცი ჰარი ძალიან სასიამოვნო ახალგაზრდად მეჩვენა!“ - განუცხადა მაკკეინმა ჟურნალისტებს სტუმრის შესახებ. მაკკეინი მხიარულ გუნებაზე ბრძანდებოდა და ისიც აღნიშნა, რომ პრინცის თაყვანისმცემელმა ქალბატონებმა „სენატის შენობაში შექმნეს „სქესობრივი თვალსაზრისით დაუბალანსებელი გარემო“. სენატორმა ვიეტნამის ომში პილოტის საკუთარი კარიერა შეადარა პრინცის კარიერას ავღანეთში  და აღნიშნა, რომ ის ჩამოუგდიათ, ხოლო ჰარი - არა; ესე იგი ჰარი გაცილებით უკეთესი პილოტია!

შემდეგ ჰარიმ გადაინაცვლა თეთრ სახლში, სადაც ის შეუერთდა მიშელ ობამასა და ვიცე-პრეზიდენტ ბაიდენის მეუღლეს - ჯილ ბაიდენს, რათა ამერიკელი მეომრების მეუღლეებთან ერთად ეზეიმათ „დედის დღე“. თეთრ სახლში არ გაუმხელიათ, თუ ვინ იქნებოდა პროგრამის „სპეციალური სტუმარი“ და მიშელ ობამამ წარადგინა იგი შეძახილით: „სიურპრიზი!“ მან ისიც აღნიშნა, რომ ჰარიმ ბევრი გააკეთა, რათა დახმარებოდა დაჭრილ ჯარისკაცებსა და მოვალეობის შესრულებისას დაღუპულ მეომართა ოჯახებს.  

პარასკევს პრინც ჰარის დაგეგმილი აქვს გვირგვინის მიტანა არლინგტონის სასაფლაოზე და ჰოსპიტალში დაჭრილი ამერიკელი ჯარისკაცების მონახულება. პრინცი აგრეთვე გაემგზავრება კოლორადოში, სადაც დაესწრება „სამხედრო თამაშობების“ გახსნას დაჭრილი ამერიკელი და ბრიტანელი სამხედროების მონაწილეობით. დამდეგი კვირის დასაწყისში ჰარი მოინახულებს ადგილებს, რომლებიც დაზიანდა 2012 წლის გრიგალ „სენდის“ დროს. პრინცი ჰარის ვიზიტი აშშ-ში ძირითადად ემსახურება  საქველმოქმედო მიზნებს.